Luke 1

Thupatna

1Eite laka a tangtungsa ▼

▼1.1 Ahikeh i up takpisa

nate thu mi tampi in na gelh khin zo uh hi. 2A tunga kipan mit-a a mute le thu’ nasemte in eite kianga hong hilhsawm bang tektek uh ahi hi. 3Tua ahi manin zahtakpipen Theophilus aw, kei mahmah in zong tuate khempeuh atunga kipan limtaka ka kantel sinsen khit ciangin a thu kizom diudeu-in nang adinga kong gelh ding pha ka sa hi. 4Tua pen nang hong kihilhte a taktak a hina na theih nading ahi hi. ^b

Baptize-pa John Suah ding Kigenkhol

5 Judea gamah Herod kumpi ahi laitakin Abijah uk siampi pawl lakah Zechariah min nei siampi khat a om hi. Ama zi Elizabeth zong Aaron suan ahi hi. 6Amau nupa Pasian muhna-ah mi thutang hi uh a, Topa thupiakte le zuih ding ngeinate khempeuh kawkbaanna om loin a zui uh hi. 7Ahi hangin Elizabeth tasel ahi manin ta a nei kei uh hi; a nih un zong a kum uh tam lua ta hi. ^c

8 Khatvei Zechariah uk pawl in na a sep hun, amah in Pasian mai-ah siampi na a sep sungin, 9siampi ngeina tawh kizui-in Topa biakinnpi sungah pai-a gimnamtui hal ding ai a san uh leh amah in a ngah hi. 10Gimnamtui hal hun a tun ciangin Pasian bia-a kikhawmte khempeuh in a pualam ah thu a ngen uh hi. ^d

11 Tua laitakin Topa vansawltak khat ama kiangah kilanga, gimnam-tui halna biakna-tau taklam pangah a ding hi. 12Zechariah in amah a muh ciangin kigaih a lau-in a koncip hi. 13Ahi hangin vansawltakin a kiangah, “Zechariah aw, lau kei in na thungetna hong kiza zo hi. Na zi Elizabeth in tapa khat nei dinga, a min John na phuak ding hi. 14Amah na lungnopna, na lungkimna hi dinga, ama suahna hangin mi tampi a kipak ding hi. 15Ahang in, Topa muhna ah amah alian ding hi. Amah in leng gahzu ahi zongin a kibilh zu nam tuamtaumte ahi zongin dawn lo dinga, a suah ▼

▼1.15 Ahikeh a nu gil sunga kipan

a kipan Khasiangtho tawh kidim ding hi. 16Israel mite tampitak, Topa amau Pasian kiang a tunpih kik ding hi. 17Tua hi-a amah in pate lungtang tate lamah kiheisak dinga, thumang lote, thumaan pilna lamah kiheisak ding, Topa adingin mite a baihsa-a, a koihkhol dingin Elijah kha le vangliatna tawh Topa mai-ah a pai ding hi,” a ci hi. ^f

18 Zechariah in tua vansawltak kiangah, “Kei lah tek ta inga, ka zi lah kum tam lua ta hi. Hih thu bangci muan ngam ding ka hi hiam?” ci-in a dong hi. ^g

19 Tua vansawltak in, Gabriel ka hi hi. Pasian kianga ding ka hi-a hih lungdamna thu nang tunga gen ding le nang hong hopih dingin kei hong kisawl hi. 20A hun a cin cianga a tung takpi ding ka thugente um lo na hi manin hih thu a tun mateng pau thei loin na daicip ding hi,” ci-in a dawng hi. ^h

21 Tua kikal sungin mipite in Zechariah na ngak uh a, biakinnpi sungah tua tanvei a om lamdang a sa uh hi. 22A paikhiat ciangin amaute a hopih thei kei hi. Amah pau thei lo a, amaute lim bek tawh a khutin a hopih ciangin biakinnpi sungah amah mangmu ahilam a theikhia pan uh hi.

23 A nasep hun sung a cin khit ciangin innah a ciah hi. 24Hih thu teng khit ciangin a zi Elizabeth gai-a kha nga sung a tang om hi. 25Amah in, “Topa in kei adingin hih hong hihsak ahi hi. Ka mite lakah tu hun laitaka ka maimawlna hong lakkhiat sakin kei hong angvan hi,” a ci hi. ⁱ

Jesu Suah ding Kigenkhol

26 A kha gukna ciangin, Pasian in Galilee gam khuapi khat ahi Nazareth ah, 27David suan, Joseph min nei pasal khat tawh kiteng dinga a kidongsa nungak bit khat kiangah vansawltak Gabriel a sawl hi. Nungak bit min Mary ahi hi. 28Ama kiangah vansawltak pai-in, “Nang hong ki-angvan mahmah nu aw kong hopih hi! Topa in nang hong ompih hi,” a ci hi.

29 Ama thugente hangin Mary lungmang mahmah a, bangci bang hopihna hiam, ci-in lamdang a sa hi. 30Ahi hangin vansawltak in ama kiangah, “Mary aw, lau kei in Pasian in nang hong angvan zo hi. 31Nau na paii dinga tapa khat na nei ding hi; a min Jesu na phuak ding hi. 32Amah lian dinga Sang Penpa Tapa kici ding hi. Topa Pasian in a pa David tokhom pia dinga, 33amah in Jacob suante uk denin ama gam a bei ngei kei ding hi,” a ci hi. ^j

34 Mary in vansawltak kiangah, “Kei nungak bit ka hi hi, hih thu bangci pian theih ding ahi hiam?” ci-in a dong hi. ^k

35 Vansawltak in, “Nang tungah Khasiangtho hong tung dinga Sang Penpa vang in nang hong sung ding hi. Tua ahi ciangin a suak ding misiangthopa, Pasian Tapa kici ▼

▼1.35 Ahikeh Tua ciangin a hong suak ding, naungek siangtho kici ding hi

ding hi. 36Na tanaunu Elizabeth nangawn in a tek nungin ta khat nei dekta hi. Amah tasel a kici nangawn a gai kha guk pha zo hi. 37Ahang in, Pasian in hih theih loh a nei kei hi,” ci-in a dawng hi. ^m

38 Mary in, “Kei, Topa nasemnu ka hi hi. Na cih bangin kei tungah piang ta hen,” a ci kik hi. Tua khit ciangin vansawltak in amah a nusia hi.

Elizabeth Kiangah Mary Hawh

39 Tua hunin Mary kithawi-a Judah gam sung mualtung khuapi khat zuanin pai mengmeng a, 40Zechariah innah lutin Elizabeth a hopih hi. 41Mary hopihna Elizabeth in a zak ciangin ama sunga naungeek dianga Elizabeth Khasiangtho tawh a kidim hi. 42Amah in: “Numeite lakah thupha ngah nu na hi-a, nang sung pana suakkhia ding naungek, thupha ngah ahi hi! 43Ahi zongin bang hanga ka Topa nu kei kianga hawh ding zah dongin kei hong ki-angvan ahi hiam? 44Nong hopihna ka zak phetin ka sunga naungeek lungdamin a diang hi. 45Topa in ama tunga a gensate a tung takpi ding hi, ci-a a um numei in thupha ngah ahi hi,” ci-in ngaihtakin a awngkhia hi.

Mary’ La

46 Tua ciangin Mary in:

“Ka hinna in Topa phat a
47 ka Honpa Pasian ah ka kha a kipak hi. ⁿ
48 ahang in a nasemnu
tualniamna hong thudon hi. ^o
Tu-a kipan khang sawnsawnte’n thupha ngah nu hong ci ding hi;
49 ahang in, Thahat Pa in kei ading na lianpipi bawl zo a - ^p
ama min siangtho hi. ^q
50 Amah a kihtate tungah akhang akhangin
ama lainatna zaam suksuk hi. ^r
51 Amah in a khut tawh a thahatna lak hi;
a lungsim tawnga kisatheite a thehthang zo hi. ^s
52 Gam-ukte amau tokhom panin khiasuk a,
ahi hangin a tualniamte lamto khin zo hi. ^t
53 A gilkialte na hoihin taisak a, ^u
ahi hangin a haute a hawm ciahsak zo hi.
54 Amah in ama nasem Israel huh a,
55 i pu i pate tungah a gensa bangin
Abraham le a suan a khakte hehpih denden ding, a phawk gige hi,” a ci hi.

56 Elizabeth kiangah Mary kha thum bang a tam khit ciangin innah a ciah hi.

Baptize-pa John Suahzia

57 Elizabeth suah hun tunga tapa khat a nei hi. 58Topa in ama tungah lainatna lianpi a lah lam a vengte le a tanaute in za-in a lungdampih uh hi.

59 A nigiatna ni-in tua naupang vun-at dingin amaute khempeuh va pai uh a, a min, a pa Zechariah tamsak dingin a kisa uh hi. 60Ahi hangin a nu in, “Hi kei! John phuah ding ahi hi,” ci-in a genkhia hi. ^v

61 Amaute in ama kiangah, “Na tanaute lakah tua min nei om lo hi,” a ci uh hi.

62 Tua ciangin a pa in naupang min ding bang phuak nuam hiam, cih amaute in khut tawh lim lakin a dong uh hi. 63Amah in suangpek khat ngen in, “Ama min John ahi hi,” ci-a a gelh ciangin tua muna omte khempeuh in lamdang a sa uh hi. 64Tua khit phetin a kam kihonga, a leigui kolin paukhia-a Pasian a phat hi. 65A vengte khempeuh in piandang a sa mahmah uh hi. Judea gam mualtung tenga mite in zong hih thute khempeuh a gengen uh hi. 66Hih thu a za peuhpeuh in lamdang sa uh a, “Tua ahileh hih naupang bangci mi hong hi tam?” ci-in a kidong ciat uh hi. Ahang in, Topa khutin amah a ompih gige hi. ^w

Zechariah’ La

67 A pa Zechariah, Khasiangtho tawh kidim a thu genin: ^x

68 “Topa, Israel-te Pasian kiphat ta hen, ^y
bang hang hiam cih leh amah hong pai-in ama mite tankhia zo hi. ^z
69 Ama nasem David suan sung panin eite ading, ^aa
hotkhiatna ki ▼

▼1.69 Hih lai-a Ki pen thahatna lim lahna hi

khat hong potosak a, ^ac
70 (tanglai ama kamsang siangthote tungtawna a gensa mah bangin),
71 i galte le ei hong mudahte khut sung panin
hotkhiatna ahi zongin,
72 i pu i pate tunga lainatna lak ding le
ama thukhun siangtho phawk gige nading ahi zongin, ^ad
73 i pa Abraham tunga a ciamsa tua kiciamna: ^ae
74 i galte khut sung panin hong kihonkhia ding,
lau lo-a ama na sem thei ding, ^af
75 i nun sung teng ama mai-ah siangthona le
thumaanna tawh ama na a sem ding i hi hi. ^ag
76 Tua ciangin nang, ka ta aw, Sang Pen-pa’ kamsangpa hong kici ding hi;
a lampi sial dingin Topa mai-ah na pai dinga, ^ah
77 amaute mawhna maisakna tungtawna
ama mite hotkhiat theihna piak nading ahi hi; ^ai
78 bang hang hiam cih leh i Pasian’ lainatna
nem ngi-ingei hangin van pan sun nisuak i tungah hong tang dinga,
79 khuamial sung le sihna liim le khuamial sunga
tengte tungah tangin,
i khete lemna lampi a tawnsak ding hi,” a ci hi. ^aj

80 Tua ciangin naupang khangto a, a lungsim a pumpi a hat hi; Israel mipite lakah a kilaak mateng gamlakah a teng hi. ^ak